|
De Fußball-Schiri Andon Piffich
En klorer Kumpel wa’.
Soi Schwichermudder nämmt er mit sich
Zum Spiel, nät bloß soi Fraa!
Die Weiwer hänn sich äwe
Ehr Kimmernis gedäält:
||: Wie g’fährlich muss en Schiri läwe,
Wu Bollezei oft fehlt! :||
De Schwalwe-Fritz is Schitzekänich
In Dannstadt bei FG.
Vor Faulspiel hot er Angscht, däss sähn ich,
Kä(n) Wunner, dut jo weh!
Drum zeicht er oft en Fall, noch
Bevor ‘n trefft de Schuh;
||: Soi Schwalwe sinn bekannt bei all, doch
Märr lacht ‘n aus dezu. :||
De eiseharte Hacke-Michel
Ve’teidicht fär Schwarz-Gri(n).
Mit soiner „Große Außesichel“
Macht er die Gechner hi(n).
Er sammelt gäle Kaade
Un Platzve’weise ach,
||: Un meischdens geht de Grips ‘m bade,
Am liebschde hot er Krach. :||
Radieselfescht. Schwarz-Gri(n) dut spiele
In Dannstadt uff de Heh.
De Schwalwe-Fritz hot glei se fihle
Dem Michel Hack soi Neh:
Kaum kummt en Eckball g’seechelt,
E Bä(n) dezwischefunkt,
||: Un iwwers Gras de Stirmer kechelt,
Grad am Elfmederpunkt. :||
|
|
De Piffich kann bloß Strofstoß peife
Un gäbbt e rodi Kaat.
Do dut de Michel sich ve’greife,
Bruddal un gaanät zaat:
Weil Rooches ploocht ‘n hefdich,
Packt er den schwarze Schuft
||: Vun vorne an de Gorchel kräfdich
Un drickt ‘m ab die Luft. :||
Die Piffich-Weiwer sinn kä(n) Flasche
Un kummen schnell gerennt.
Sie schwenken hoch ehr Oikaafsdasche,
Debei wärd lauthals g’schännt.
Zwelf Bund Radiesel hot de
Hack uff de Schädel kriecht,
||: En Rissling noch, un uffm Bodde
Der Fußball-Rowdy licht. :||
Wär’n nät die Bollezischde kumme,
Er hett’s nät iwwerlebt.
Sie hänn de Michel mitgenumme,
Der ziddert noch un bebt.
De Dokder hot ‘m kunschtvoll
Die Kopphaut widder g’flickt,
||: De Michel awwer is wie schunscht doll,
Jo, wochelang ve’rickt. :||
Mit Hilf vun Fraa un Schwichermudder
De Piffich is im Lot,
Dank dänne alles is in Budder –
Beschitz se, liewer Gott!
Jetzt wääß de letschde Penner:
Im Spiel bei Läwensg’fah’
||: Am beschde helft de Peifemänner
Die eiche Ehjefraa! :||
|
